పుట్టెడు దుఃఖంలోనూ అద్భుత పోరాటం: వరల్డ్ కప్ విజయాన్ని సోదరికి అంకితమిచ్చిన ఇషాన్ కిషన్

ఫైనల్ మ్యాచ్‌కు సరిగ్గా ఒక్కరోజు ముందు (శుక్రవారం), ఇషాన్ కిషన్ కజిన్ సిస్టర్ మరియు ఆమె భర్త రోడ్డు ప్రమాదంలో మరణించారు. మార్చి 6న జరిగిన ఈ ఘోర ప్రమాదంతో ఇషాన్ కుటుంబం మొత్తం తీవ్ర దిగ్భ్రాంతికి లోనైంది. ఈ విషాదం కారణంగా తన కుటుంబ సభ్యులు ఫైనల్ మ్యాచ్ చూడటానికి రాలేకపోయారు. అయితే, దేశం కోసం ఆడి గెలవాలనే పట్టుదలతో ఇషాన్ మైదానంలోకి దిగాడు. ఈ ఫైనల్ పోరులో కేవలం 25 బంతుల్లోనే 4 ఫోర్లు, 4 సిక్సర్లతో 54 పరుగులు రాబట్టి సంచలనం సృష్టించాడు. హాఫ్ సెంచరీ పూర్తయ్యాక, బ్యాట్‌ను ఆకాశం వైపు చూపిస్తూ తన సోదరికి నివాళులర్పించిన దృశ్యం అందరినీ ఆకట్టుకుంది. హార్దిక్ ప్రోత్సాహం.. సూర్య నమ్మకం! విజయం అనంతరం ఇషాన్ మాట్లాడుతూ.. "నా సోదరి మరణవార్త విన్నప్పుడు చాలా బాధపడ్డాను. ఈ విషయాన్ని హార్దిక్ పాండ్యతో పంచుకున్నాను. అతడు నన్ను ఎంతగానో ప్రోత్సహించి జట్టు కోసం ఆడమని ధైర్యం చెప్పాడు. మహిళా దినోత్సవం రోజున దక్కిన ఈ విజయాన్ని నా సోదరికి అంకితమిస్తున్నాను" అని తెలిపాడు. అలాగే వరల్డ్ కప్ ముందు సూర్యకుమార్ యాదవ్‌తో జరిగిన ఫోన్ సంభాషణను గుర్తు చేసుకున్నాడు. "సూర్య భాయ్ నాకు కాల్ చేసి వరల్డ్ కప్ గెలిపిస్తున్నావా? అని అడిగాడు. 'మీరు నమ్ముతున్నారా?' అని నేను తిరిగి ప్రశ్నిస్తే, 'ఖచ్చితంగా నమ్ముతున్నా' అని సూర్య చెప్పిన మాటలే నన్ను ఈ స్థాయికి చేర్చాయి" అని ఇషాన్ పేర్కొన్నాడు. తిరుగులేని పునరాగమనం: టోర్నీలో ఫోర్త్ టాపర్ కొంతకాలంగా జాతీయ జట్టుకు దూరంగా ఉండి, అనూహ్యంగా వరల్డ్ కప్ జట్టులోకి వచ్చిన ఇషాన్ కిషన్, ఈ టోర్నమెంట్‌లో అద్భుతమైన ఫామ్‌ను కనబరిచాడు. మొత్తం 9 మ్యాచుల్లో 317 పరుగులు సాధించి, ఈ మెగా టోర్నీలో అత్యధిక పరుగులు చేసిన బ్యాటర్ల జాబితాలో నాలుగో స్థానంలో నిలిచాడు. కష్టకాలంలోనూ అజేయమైన సంకల్పంతో ఆడి టీమ్ ఇండియాను విశ్వవిజేతగా నిలబెట్టడంలో కీలక పాత్ర పోషించాడు.