మెగా కోడలికి వేధింపులు.. లావణ్య త్రిపాఠి సైబర్ క్రైమ్ పోలీసులకు ఫిర్యాదు!

తెలుగు చిత్ర పరిశ్రమలో 'అందాల రాక్షసి' వంటి చిత్రాలతో తనకంటూ ప్రత్యేక గుర్తింపు తెచ్చుకున్న నటి, మెగా కోడలు లావణ్య త్రిపాఠి కొణిదెల. అయితే, కొంతకాలంగా తాను సామాజిక మాధ్యమాల్లో వేధింపులకు గురవుతున్నానని ఆమె తెలిపారు. తన వ్యక్తిత్వాన్ని దెబ్బతీసే విధంగా, తన కుటుంబ గౌరవానికి భంగం కలిగించే విధంగా పోస్టులు పెడుతున్న వారిపై చట్టపరమైన చర్యలు తీసుకోవాలని కోరుతూ లావణ్య హైదరాబాద్ సైబర్ క్రైమ్ పోలీసులను ఆశ్రయించారు. కొంతకాలంగా 'పర్పుల్ క్రేయాన్00' (Purple Crayon00) అనే ఇన్‌స్టాగ్రామ్ ఖాతా తనను లక్ష్యంగా చేసుకుని అసభ్యకరమైన పోస్టులు, వ్యాఖ్యలు చేస్తోందని లావణ్య పోలీసులకు ఫిర్యాదు చేశారు. ఆ ఖాతా నిర్వాహకులు తనను నటిగా మాత్రమే కాకుండా, వ్యక్తిగతంగా తన నైతిక విలువలను ప్రశ్నిస్తూ, తప్పుడు ఆరోపణలతో తన ప్రతిష్టను దెబ్బతీస్తున్నారని ఆమె పేర్కొన్నారు. ఇది తన మానసిక ప్రశాంతతను దెబ్బతీయడమే కాకుండా, తన కుటుంబ గౌరవానికి ముప్పు కలిగిస్తోందని తన ఫిర్యాదులో లావణ్య ఆవేదన వ్యక్తం చేశారు. సంబంధిత ఇన్‌స్టాగ్రామ్ ఖాతాదారుడిని గుర్తించి కఠిన చర్యలు తీసుకోవాలని, ఆ ఖాతా ద్వారా చేసిన పోస్టులను తక్షణమే తొలగించేందుకు చర్యలు చేపట్టాలని ఆమె పోలీసులను కోరారు. లావణ్య ఫిర్యాదును తీవ్రంగా పరిగణించిన పోలీసులు వెంటనే రంగంలోకి దిగారు. ఈ విషయంలో, ఐటీ చట్టం సెక్షన్ 67, భారతీయ న్యాయ సంహిత (BNS) సెక్షన్లు 78 & 79 కింద డిజిటల్ మీడియా దుర్వినియోగానికి సంబంధించిన కేసు నమోదు చేశారు. ప్రస్తుతం, సైబర్ క్రైమ్ అధికారులు ఆ ఇన్‌స్టాగ్రామ్ ఖాతా ఐపీ అడ్రస్ మరియు ఇతర సాంకేతిక ఆధారాల ద్వారా నిందితులను గుర్తించే ప్రక్రియలో ఉన్నారు. వ్యక్తిగత జీవితంలో ఇటువంటి ఇబ్బందులను ఎదుర్కొంటున్నప్పటికీ, లావణ్య తన వృత్తిపరమైన బాధ్యతలపై దృష్టి సారించారు. ఆమె ప్రధాన పాత్ర పోషించిన 'సతి లీలావతి' చిత్రం విడుదల సిద్ధంగా ఉంది. వాస్తవానికి, ఈ చిత్రం మార్చి 6, 2026న విడుదల కావాల్సి ఉండగా, కొన్ని అనివార్య కారణాల వల్ల వాయిదా పడింది. త్వరలోనే చిత్ర యూనిట్ కొత్త విడుదల తేదీని ప్రకటిస్తుంది.