హాకీ ప్రపంచకప్ క్వాలిఫైయింగ్ టోర్నమెంట్‌ను విజయవంతం చేస్తామని మంత్రి వాకిటి శ్రీహరి ధీమా

హైదరాబాద్ నగరం మరో ప్రతిష్టాత్మక అంతర్జాతీయ క్రీడా పోటీలకు ఆతిథ్యం ఇవ్వడానికి సంసిద్ధంగా ఉంది. ఈ నెల 8వ తేదీ నుండి 14వ తేదీ వరకు గచ్చిబౌలిలోని హాకీ గ్రౌండ్‌లో, గచ్చిబౌలి హాకీ స్టేడియం ప్రాంగణంలో మహిళల హాకీ ప్రపంచకప్ క్వాలిఫైయింగ్ టోర్నమెంట్ జరగనుంది. భారతదేశంతో సహా మొత్తం 8 జట్లు పోటీపడే ఈ భారీ టోర్నమెంట్ కోసం అన్ని ఏర్పాట్లు పూర్తయ్యాయని క్రీడాశాఖ మంత్రి వాకిటి శ్రీహరి వెల్లడించారు. గురువారం నాడు SAT చైర్మన్ శివసేన రెడ్డి, MD సోనీ బాలదేవితో కలిసి ఆయన టోర్నమెంట్ వివరాలను వెల్లడించారు. వివిధ దేశాల నుండి వచ్చిన జట్లు ఇప్పటికే నగరానికి చేరుకుని ప్రపంచకప్ కోసం సాధన చేస్తున్నాయని మంత్రి తెలిపారు. ఈ టోర్నమెంట్ నిర్వహణకు ప్రభుత్వం, క్రీడా శాఖ రూ. 18 కోట్లు ఖర్చు చేస్తున్నాయని, ఇందులో రెండు ఆస్ట్రో టర్ఫ్‌ల ఏర్పాటుకు రూ. 9 కోట్లు వెచ్చించారని ఆయన వివరించారు. ఇంటర్నేషనల్ హాకీ ఫెడరేషన్ (FIH) మరియు హాకీ ఇండియా (HI) ప్రతినిధులతో సమన్వయం చేసుకుంటూ టోర్నమెంట్‌ను విజయవంతంగా నిర్వహించడానికి చర్యలు తీసుకున్నట్లు మంత్రి వివరించారు. టోర్నమెంట్ ప్రారంభోత్సవానికి ముఖ్యమంత్రి రేవంత్ రెడ్డికి ఆహ్వానం పంపినట్లు తెలిపారు.