టాలీవుడ్‌లో స్పోర్ట్స్ ఫీవర్: క్రీడా మైదానంలో కదం తొక్కుతున్న కథానాయకులు

తెలుగు చలనచిత్ర పరిశ్రమలో ప్రస్తుతం ఒక సరికొత్త ఒరవడి కనిపిస్తోంది. కేవలం కమర్షియల్ హంగులకే పరిమితం కాకుండా, కథానాయకులు క్రీడా నేపథ్యంలో సాగే 'స్పోర్ట్స్ డ్రామా'లపై ప్రత్యేక ఆసక్తిని కనబరుస్తున్నారు. ఒకప్పుడు క్రీడా నేపథ్యం అంటే కేవలం కొన్ని సన్నివేశాలకే పరిమితమయ్యేది, కానీ ఇప్పుడు ఆ క్రీడ చుట్టూనే కథా గమనాన్ని నడిపిస్తూ ప్రేక్షకులని అలరిస్తున్నారు.

పాత్ర కోసం ప్రాణం పెట్టే మేకోవర్

ప్రస్తుత తరం నటులు తమ పాత్రల కోసం పడుతున్న తపన అసాధారణంగా ఉంది. కేవలం మేకప్‌తో సరిపెట్టకుండా, ఆయా క్రీడల్లో వృత్తిపరమైన శిక్షణ పొందుతూ శ్రమిస్తున్నారు. ఉదాహరణకు, బుచ్చిబాబు సానా దర్శకత్వంలో రామ్ చరణ్ నటిస్తున్న 'పెద్ది' చిత్రం కోసం ఆయన ఒక ప్రొఫెషనల్ క్రికెటర్ లాగే కనిపిస్తున్నారు. ఈ పాత్ర కోసం చరణ్ ప్రత్యేకంగా ఆస్ట్రేలియాలో ఫిట్‌నెస్ శిక్షణ పొందడమే కాకుండా, తన శరీరాకృతిని పూర్తిగా మార్చుకున్నారు. అదేవిధంగా, 'బైకర్' చిత్రంలో శర్వానంద్ ఒక ప్రొఫెషనల్ స్పోర్ట్స్ బైకర్‌గా కనిపించేందుకు రిస్క్‌తో కూడిన రేసింగ్ మెళకువలను నేర్చుకుంటున్నారు.

ప్రేరణగా నిలిచిన క్లాసిక్ చిత్రాలు

తెలుగులో స్పోర్ట్స్ డ్రామాల గురించి మాట్లాడుకుంటే నాని నటించిన 'జెర్సీ' చిత్రం ఒక మైలురాయి. విఫలమైన ఒక క్రికెటర్ తన కొడుకు కోసం తిరిగి మైదానంలోకి దిగి సాధించిన విజయం, ఆ ప్రయాణంలో ఎదురయ్యే భావోద్వేగాలు ఈ తరహా చిత్రాలకు కొత్త ఊపిరి పోశాయి. అంతకుముందు వచ్చిన త‌మ్ముడు, సై, అమ్మా నాన్న ఓ త‌మిళ‌మ్మాయి, ఒక్క‌డు, భీమిలి కబడ్డీ జట్టు, వంటి చిత్రాలు కూడా క్రీడల నేపథ్యంలో సాగి విజయవంతమయ్యాయి. ఈ చిత్రాల విజయం ఇచ్చిన ధైర్యంతోనే నేడు అగ్ర కథానాయకులు సైతం స్పోర్ట్స్ ఫిలిమ్స్ వైపు అడుగులు వేస్తున్నారు.

అభిమానుల్లో పెరుగుతున్న అంచనాలు

క్రీడా నేపథ్యంలో వచ్చే చిత్రాలు కేవలం వినోదాన్ని మాత్రమే కాకుండా, స్ఫూర్తిని కూడా ఇస్తాయి. బాక్సింగ్ నేపథ్యంలో వచ్చిన 'లైగర్', 'గని' వంటి చిత్రాలు ఆశించిన ఫలితాలను ఇవ్వకపోయినప్పటికీ, నటులు పడిన శ్రమను ప్రేక్షకులు గుర్తించారు. ఇప్పుడు రాబోయే 'పెద్ది', 'బైకర్' వంటి చిత్రాలు టెక్నికల్‌గా కూడా చాలా హై స్టాండర్డ్స్‌లో ఉండబోతున్నాయి. కథానాయకులు చూపిస్తున్న ఈ తెగింపు, మేకోవర్ టాలీవుడ్‌లో స్పోర్ట్స్ డ్రామాల శకానికి సరికొత్త గ్లామర్‌ను అద్దుతున్నాయి.